3:

एकीकडे मुंबईत अजित पवार यांच्या पत्नी सुनेत्रा पवार या आज उपमुख्यमंत्रिपदाची शपथ घेणार असताना, दुसरीकडे बारामतीतून महत्त्वाची राजकीय हालचाल समोर आली आहे. सुप्रिया सुळे या अजित पवारांच्या आई आशाताई पवार यांची भेट घेण्यासाठी काटेवाडी येथे पोहोचल्या आहेत.

सुप्रिया सुळे काटेवाडीतील अजित पवारांच्या निवासस्थानी गेल्या असून, त्यांनी आशाताईंशी जवळपास अर्धा तास चर्चा केली. अजित पवारांच्या अपघातानंतर बराच वेळ त्यांच्या आईला घटनेची माहिती देण्यात आली नव्हती. बारामती, काटेवाडीसह संपूर्ण राज्यात अजित पवारांच्या निधनामुळे हळहळ व्यक्त केली जात आहे.

दरम्यान, आज सुनेत्रा पवार उपमुख्यमंत्रिपदाची शपथ घेणार आहेत. या शपथविधीबाबत माहिती नसल्याचे शरद पवार यांनी सकाळी माध्यमांशी बोलताना सांगितले. मुंबईत राजकीय घडामोडी सुरू असतानाच सुप्रिया सुळे काटेवाडी येथे आशाताईंना भेटण्यासाठी गेल्याने या भेटीला विशेष महत्त्व प्राप्त झाले आहे.

सुप्रिया सुळे या आज दिल्लीला जाणार असून, सध्या संसदेचे अधिवेशन सुरू आहे. उद्या देशाचा अर्थसंकल्प सादर होणार असल्याने त्या दिल्लीला रवाना होणार आहेत. दिल्लीला जाण्यापूर्वी त्या आशाताईंना भेटण्यासाठी काटेवाडीला गेल्याचे त्यांनी स्पष्ट केले.

“उद्या देशाचं बजेट आहे. त्यासाठी मला दिल्लीला जायचं आहे. पुण्याहून मी दिल्लीला जाणार आहे. त्याआधी आशाकाकींना भेटण्यासाठी आले होते,” असे सुप्रिया सुळे यांनी सांगितले.

पार्थ पवार गोविंदबागेत; राजकीय चर्चांना वेग

दरम्यान, सुनेत्रा पवार या शरद पवार किंवा पवार कुटुंबातील अन्य सदस्यांशी राजकीय चर्चा न करता मुंबईत गेल्याची चर्चा सुरू होती. अशा पार्श्वभूमीवर पार्थ पवार हे गोविंदबागेत शरद पवार यांच्या भेटीसाठी पोहोचल्याने राजकीय घडामोडींना वेग आला आहे.

सुनेत्रा पवारांची गटनेतेपदी एकमताने निवड

सुनेत्रा पवार आज (31 जानेवारी) सायंकाळी 5 वाजता उपमुख्यमंत्रिपदाची शपथ घेणार आहेत. त्या राज्याच्या पहिल्या महिला उपमुख्यमंत्री ठरणार आहेत. शपथविधीपूर्वी विधानभवनात राष्ट्रवादी काँग्रेसच्या विधिमंडळ पक्षाची बैठक झाली. या बैठकीत दिलीप वळसे पाटील यांनी सुनेत्रा पवार यांचे नाव गटनेतेपदासाठी सुचवले, तर छगन भुजबळ यांनी त्याला अनुमोदन दिले. परिणामी, सुनेत्रा पवार यांची एकमताने गटनेतेपदी निवड झाली.

कोणती खाती सुनेत्रा पवारांकडे राहणार?

अजित पवारांकडे उपमुख्यमंत्रिपदासोबत अर्थसह महत्त्वाची खाती होती. मात्र, सध्या अर्थ खाते वगळता इतर खाती सुनेत्रा पवारांकडेच राहणार आहेत. राज्य उत्पादन शुल्क आणि क्रीडा विभाग ही जबाबदारी त्यांच्याकडे कायम राहणार आहे. अर्थसंकल्प अधिवेशनानंतर अर्थ खातेही त्यांच्याकडे येण्याची शक्यता वर्तवली जात आहे. आज मात्र केवळ सुनेत्रा पवार यांचाच शपथविधी होणार आहे.